फळ विक्रेत्यांचा मुलगा ते 3000 कोटीची संपत्ती असणाऱ्या नॅचरल आईस्क्रीमचा मालक… थक्क करणारा प्रवास

नॅचरल आईस्क्रीम ही सर्वाधिक आवडीची आईस्क्रीम म्हणून पहिली जाते. या आईस्क्रीमच्या मागे दडलीय एक थक्क करणारी प्रेरणादायी कहाणी… कर्नाटकमधील मंगलोर जिल्ह्यातील पतूर तालुक्यातील मुलकी या गावातील रघुनंदन श्रीनिवास कामथ हा एका गरीब फळ विक्रेत्यांचा मुलगा.

महिन्याला 100 रुपये कमावून त्यात 7 मुलांची कशी तरी गुजराण ते करत होते. रघुनंदनने अत्यंत हलाखीत दिवस काढले. 15व्या वर्षी सर्व कामथ कुटुंब कर्नाटक वरून मुंबईला स्थलांतरीत झाले. मुंबईला जुहू कोळीवाड्यातील एका 12 by 12 च्या खोलीमध्ये सर्व कुटुंब राहायचे. रघुनंदन हा घरातील सर्वात लहान सदस्य असल्याने त्याला कॉटखाली झोपावे लागायचे.

वयाच्या 15 वर्षी मुंबईत सुरुवातीला रघुनंदन यांनी चप्पल विक्रीचा व्यवसाय केला. त्यानंतर त्यांचा मोठा भाऊ जो त्यांच्याहून २० वर्षांनी मोठा, त्याचा उसळ पावचा व्यवसाय होता. त्यातून त्याने व्यवसाय वाढवून गोकुळ रिफ्रेशमेन्टमार्फत साऊथ इंडियन फूड आणि घरगुती आईस्क्रीमचा व्यवसाय सुरू केला.

रघुनंदन कामथ भावाच्या व्यवसायात भावाला मदत करायचे. त्यातून त्यांनी पाहिले की लोकांना आईस्क्रीम जास्त आवडते व ती आवडली तर दुसऱ्यांसोबत शेअर करतात. यातून त्यांना कल्पना सुचली की ग्राहकांना फळांचे तुकडे असणारी, नैसर्गिक फळांपासून बनवलेली आईस्क्रीम कृत्रिम फ्लेवरच्या आईस्क्रीमपेक्षा जास्त आवडेल.

त्यांनी ही आपली कल्पना आपल्या घरच्यांना सांगितली, पण कोणीच ती मनावर घेतली नाही. पण रघुनंदन कामथ एका योग्य वेळेची वाट पाहून होते. काही दिवसांनी त्यांच्या पारिवारिक संपत्तीची वाटणी करण्याची वेळ आली, तेव्हा इतर भावांप्रमाणे त्यांनी मासिक स्वरूपात रक्कम स्वीकारण्याऐवजी एकदम एक लाख रुपयांची रक्कम घेतली.

नवीन लग्न झालेल्या रघुनंदन कामथ यांना जाणवले की मुंबईसारख्या शहरात एक लाख रुपयाच्या बीज भांडवलावर व्यवसाय करणे शक्य नाही. याप्रसंगी त्यांची पत्नी अन्नपूर्णा यांनी त्यांना हिम्मत दिली प्रोत्साहन दिले. नातेवाईक आणि मित्रांकडून 3 लाख रुपये जमा करून १९८४साली ते आईस्क्रिमच्या व्यवसायात उतरले.

जुहू विलेपार्ले डेव्हलपमेंट स्कीम (जेवीपीडीएस) इथे नॅचरल आईस्क्रीम या नावाने ३५०स्केअर फूट जागेत पहिले शॉप सुरू केले. सुरुवातीला रघुनंदन व त्यांची पत्नी यांच्यासह चार कर्मचारी होते. सुरुवातीला 15 किलो आईस्क्रीम 10 फ्लेवरमध्ये बनवली. ज्याचे एका आठवड्यात १ हजार कप विकले गेले. रघुनंदन सायकलवरून जाऊन ग्राहक जोडण्यासाठी पायपीट करत असत. त्यात ते प्रसिद्ध व्यक्तींकडे जाऊन त्यांना आईस्क्रीम वितरित करायचे. यातून बॉलिवूडमधील प्रसिद्ध व्यक्तींना जोडले. 2 वर्षात त्यांनी 14 लाखांचा व्यवसाय केला.

तिथून त्यांनी मागे वळून पहिलेच नाही. त्यांची आईस्क्रीम पर्यटकांच्या पसंतीला उतरली. आईस्क्रीमसाठी लागणारे दूध ते मुंबईतील दर्जेदार दूध समजल्या जाणाऱ्या नोबल डेरीचे दूध घेतात, तर साखर ही दर्जेदार फार्मा ग्रेडची घेतात. वडील फळ विक्रेते असल्याने फळांचे पारखी आहेत. आईस्क्रीमसाठी अत्यंत दर्जेदार गोष्टी घेण्याबाबत त्यांचा पूर्वीपासून कटाक्ष आहे.

आज नॅचरल आईस्क्रीमचे देशभरात १५०हुन अधिक आऊटलेट आहेत. तर ६० फळांपासून 100 हन अधिक फ्लेवरची आईस्क्रीम उत्पादित करतात. आज कंपनीचे 3000 हजार कोटींचे एकून मूल्य आहे. चारकोप कांदिवली वेस्टला त्यांची स्वतःची आईस्क्रीम फॅक्टरी आहे. रोज 20 टन आईस्क्रीम बनवली जाते व पॅक करून देशभरात वितरित केली जाते.

तर हा होता, एका गरीब फळ विक्रेत्यांचा मुलगा ते 3000 कोटींची उलाढाल असलेल्या नॅचरल आईस्क्रीमचे मालक रघुनंदन कामत यांचा थक्क करणारा प्रेरणादायी प्रवास. आवडल्यास अवश्य शेअर करा.