फोर्ब्सच्या जागतिक अब्जाधीशांच्या यादीत ‘मराठी उद्योजक’ आनंद देशपांडेंचा समावेश

माहिती तंत्रज्ञान क्षेत्रातील अग्रगण्य, पुण्यातील ‘पर्सिस्टंट सिस्टीम’ या कंपनीचे संचालक आनंद देशपांडे यांचा गुरुवारी जगभरातील अब्जाधीशांच्या यादीत समावेश करण्यात आला आहे. महाविद्यालयीन शिक्षणानंतर अमेरिकेमध्ये चांगल्या नोकरीच्या आशेने गेलेले देशपांडे वयाच्या २८ व्या वर्षी पुन्हा मायदेशी परत आले आणि त्यांनी स्वत:चा उद्योग सुरु केला. अमेरिकेत ते एचपी कंपनीत इंजिनीअर म्हणून काम करत होते. सन १९९० मध्ये त्यांच्याकडची शिल्लक आणि वडील व मित्रांकडून घेतलेले कर्ज यातून २१ हजार डॉलर्स उभे केले आणि पर्सिस्टंट सिस्टिम ही कंपनी पुण्यात सुरू केली. आज कंपनीची उलाढाल ५६६ दशलक्ष डॉलर्सची आहे. देशपांडे यांच्याकडे ‘पर्सिस्टंट’चे तीस टक्के शेअर्स आहेत. त्यांची आजची किंमत १ अब्ज डॉलर्सपेक्षा जास्त म्हणजेच सुमारे साडेसात हजार कोटी रुपये (१ बिलियन डॉलर्स) आहे. त्यामुळेच फोर्ब्सच्या अब्जाधीशांच्या यादीत त्यांचा समावेश झाला आहे.

मार्च २०२१ला संपलेल्या आर्थिक वर्षात या कंपनीने उत्पन्नात १३ टक्के वाढ केली. कंपनीचा निव्वळ नफा ३८ टक्क्यांनी वाढून ६२ दशलक्ष डॉलर्सवर गेला. पर्सिस्टंटच्या एकूण व्यवसायातील ८० टक्के वार्षिक महसूल अमेरिकेतून येतो. उर्वरीत वीस टक्के युरोप आणि भारतातून येतो. देशपांडे यांनी पाच सहकाऱ्यांच्या मदतीने सुरु केलेल्या या कंपनीत आता जगभरातील ४५ देशांमधील १४ हजारांहून अधिक इंजीनीयर्स आणि कर्मचारी काम करतात. टीसीएस, इन्फोसिस, विप्रो यांच्याप्रमाणेच पर्सिस्टंट हीसुद्धा नामांकित कंपनी आहे.

२०१९ मध्ये देशपांडे यांनी कंपनीचे सीईओपद सोडले. ते आता अध्यक्ष आणि व्यवस्थापकीय संचालकपदाची जबाबदारी सांभाळतात. देशपांडे मूळचे मध्य प्रदेशातील भोपाळ येथील असून त्यांचे शिक्षण इंग्रजी माध्यमातून झाले. खरगपूर आयआयटीतून शिक्षण घेतल्यानंतर त्यांनी १९८९ मध्ये अमेरिकेतून पीएचडी मिळवली. १९९०मध्ये भारतात सॉफ्टवेअर टेक्नॉलॉजी पार्क ही संकल्पना सुरू झाल्यानंतर देशपांडे अमेरिकेतून भारतात परतले. ‘पर्सिस्टंट’व्यतिरिक्त स्वत:च्या फाउंडेशनच्या माध्यमातून ते तरुणांना मार्गदर्शन करतात. पंचवीस हजार उद्योजक तयार करण्याचे उद्दिष्ट त्यांनी ठेवले असून उद्योग सुरू करू इच्छिणाऱ्या तरुणांना ते मार्गदर्शन करतात.

सर्वसामान्य कुटुंबामधून पुढे आलेलं नेतृत्व म्हणून देशपांडे यांच्याकडे पाहिलं जातं. मराठी माणूससुद्धा मेहनतीच्या जोरावर प्रचंड मोठं यश मिळवू शकतो हे आनंद देशपांडेंनी दाखवून दिलं आहे. त्यांचं मनःपूर्वक अभिनंदन….